LAOAG CITY – Inpalgak ni First Lady Liza Marcos a “bad shot” kenkuanan ni Vice President Sara Duterte.
Iti maysa a video teaser nga interview ti maysa a mabigbig a broadcaster iti first lady ket inrakurak na a nasaktan iti panagatendar ti maysa a rally ti bise presidente ken nagkatawa idi naibaga a “bangag” ni Presidente Ferdinand Marcos Jr.
Inpetteng na a saanna a nagustwan ti nagbalin nga aksyon ti bise presidente ken inadmitir na a nagsakit ti nakemna.
Inpaganetget na pay nga uray ni dati a Vice Presidente Leni Robredo ket saanna nga inaramid daytoy.
Kuna ti First Lady nga ar-aramiden ti asawa na a ni Presidente Marcos ti amin tapno maprotehiran ti bise presidente manipod kadagiti pammabalaw kenkuana gapu ta maymaysa da laeng a team idi panawen ti eleksyon ken agkukuyug a bumangon kadagiti banat dagiti kalaban.
Inbatad pay ni First lady Marcos a nagbalin a nasayaat ken ni Vice President Duterte ngem naglabes daytoyen isut gapuna a nagbalin laengen a napudno.
Maipalagip a kadagiti nagbalin a departure ni Presidente Ferdinand Marcos Jr., iti panagturong na idiay abroad, naobserbaran a saan a pulos a panpansinen ti first lady ti bise presidente.
