LAOAG CITY – Kiniddaw ni dati nga House Speaker Ferdinand Martin Romualdez nga ag-inhibit ti Office of the Ombudsman iti imbestigasyon kontra kenkuana mainaig iti maipagarop a kontrobersyal a flood control projects, gapu ta ibilang na nga adda ti “pattern of prejudgment” a manglablabsing iti due process.
Iti uppat a pinanid a surat a napetsaan ti Abril 22, 2026, inpetteng dagiti abogado ni Romualdez manipod iti Villaraza & Angangco a dagiti inrakurak ni Ombudsman Jesus Crispin Remulla ken sumagmamano nga opisyal na ket mangipakpakita iti arigna nadesisyunan ti panagpila da ti kaso a plunder uray awan pay ti pormal a reklamo wenno preliminary investigation.
Dinakamat pay ti kampo ni Romualdez a nangrugi pay idi Nobyembre 2025 ti maipagarop a panagbalin a bias idi dinakamat ni Remulla nga ad-adalenen ti opisina na ti kaso ken possible nga addaan ti plunder charges.
Apaman a nadanun ti Abril 2026, rimuar pay dagiti rakurak a seryoso nga isagsaganan ti kaso, a basar iti depensa ket indikasyon ti nasapa a panangbukel ti prosecution theory.
Dinakamat pay dagiti abogado ti press conference no sadinno a maipagarop nga inawagan ni Assistant Ombudsman Mico Clavano ni Romualdez a “master plunderer,” banag nga ad-adda a mangipakita nga adda ti kankanunungan da.
Inpetteng ti depensa a mangitund daytoy ti impresyon a ti imbestigasyon ket agbalin a “mere formality” laeng tapno ikalintegan ti naituding a resulta.
Gapu iti daytoy, nagpanawagan ni Romualdez a ti aniaman a reklamo ket iggaman ti maysa a neutral ken independent-minded nga opisyal tapno masigurado ti patas a proseso ken mapagtalinaed ti panagtalek ti publiko iti justice system.
