LAOAG CITY – Maikarigatan a matarimaan amin dagiti flood control projects a nadadael gapu iti bagyo sakbay a madanon ti panawen ti panagtutudo.
Segun ken ni Engr. Glenn Miguel, District Engineer ti Department of Public Works and Highways – First Engineering District Office, dagiti proyekto a nadadael idi 2024 ket sukatan dagiti maseknan a kontraktor idinto a dagiti met nadadael idi 2023 ket nakabirokdan ti pundo a mailatang para iti daytoy.
Inbatadna nga apaman a maalada ti pundo ket dagus a maibusbos daytoy ti pannakatarimaan kadagiti nadakamat a proyekto.
Innayonna nga ikarigatanda a maileppas dagitoy sakbay a sumangbay ti panagtutudo.
