LAOAG CITY – Ipaima ni dati a Presidente Rodrigo Duterte iti Dios ti agbalin a resulta ti panangiyetnag ti desision ti Appeals Chamber ti International Criminal Court ita a Mierkoles, Abril 22 mainaig iti hurisdiksion iti kaso basar iti buridek nga anakna a ni Veronica “Kitty” Duterte.
Inbatad ni Kitty nga adda ti nasayaat a kondision ti dati a Presidente ken naka-adjust daytoyen ti situasionna kabayatan nga ur-urayenna ti sumaruno a mapasamak ti kasona ti International Criminal Court.
Inpakaammona nga adda ti nasayaat a kasasaad ti amana ken adda ti panangtarabay ti legal team-na nupay inadmitir daytoy a makarikrikna ti sagpaminsan a panagladingit ti dati a Presidente.
Inburayna pay ti rakurak ni dati a Presidente a saanda nga ibain gapu ta awan met ti dakes nga ar-aramidenna daytoy ken inpasigurado ni Kitty nga ipanpannakelda isuna kas amada.
Nagyamanan isuna kadagiti sumupsuporta iti pamiliada iti baet kadagiti maibatbato nga isyu pakairamanan ditoy dagiti kritisismo ti kabsatna a ni Vice President Sara Duterte.
Iti panagbisita ni Kitty idi Martes, Abril 21, inburayna ti mensahe ti dati a Presidente kadagiti supporters-na a daytoy ket Invictus, pagsasao a Latin kayatna a saoen ket unconquered wenno undefeated.
