LAOAG CITY – Kalikagom ni France Ambassador to the Philippines Thierry Mathou nga ad-adda pay a mapatibker ti relasyon ti pagilyan da ken iti Pilipinas kangrunaan na ditoy probinsya nga Ilocos Norte.
Naamoan a kayat koma ni Mathou a makita ken makasarita ni Governor Imee Marcos iti ibibisita na ditoy probinsya tapno maam-ammo na a naimbag iti Ilocos Norte.
Nupay kasta, awan ti gobernador gapu ta napan nagatendar iti pinagkasangay ni Presidente Rodrigo Duterte.
Gapu iti daytoy, nakipagkita laengen ni Mathou kenni Vice Governor Angelo Marcos Barba ken ado dagiti napagsaritaan da.
Karaman ditoy ti pakaseknan ti sitwasyon iti ekonomiya ditoy probinsya kangrunaan na iti benneg iti agri-business ken ti panagkalikagom ti France nga umay agpuunan iti Pilipinas a pakairamanan iti Ilocos Norte.
Inbatad ni Mathou a ti agri-business ti kangrunaan a kayat da a padur-asen ditoy pagilyan.
