LAOAG CITY – Naarestar ti dua a babbai ken maysa a lalaki idinto a nakataray ti maysa a kadwa da iti insayangkat nga illegal gambling operation dagiti kameng ti Philippine National Police (PNP) iti compound ti Pamilya Ramos iti Barangay 15 ditoy ciudad ti Laoag.
Nabigbig dagiti naarestar nga isuda Cindy Hilo y Ramos, agtawen ti 34, (frontliner) volunteer nurse ti Dingras District Hospital, residente ti Brgy. Saludares iti ili ti Dingras; Jomer Raquino y Ayson, agtawen ti 32, baro ken ni Judelyn Maneja y Domingo, agtawen ti 37, awanan ti asawa, awanan ti trabaho, agpada dagitoy a residente iti Brgy 15 ditoy ciudad ti Laoag; idinto a ti nakalibas ket ni Franny Mateo, residente ti Brgy. 15 ditoy ciudad ti Laoag.
Basar iti report, naaktuwan a mismo dagiti otoridad dagiti suspek nga agsusugal iti compound ti Pamilya Ramos iti Barangay 15 ditoy ciudad ti Laoag.
Nakumpiskar dagiti otoridad iti lugar ti 52 a pedaso ti baraha, P2,770.00 a pusta dagiti suspek, maysa a lamisaan a naarpawan ti labakara, lima a tugaw, ken ti personal a kwarta dagiti suspek nga agdagop amin ti 570 a pisos.
Immunan a kwinestyunaran ni Raquino ti kaadda ti naibaga a nakumpiskar a personal a kwarta na nga umabot ti 150 a pisos.
Nupay kasta, inbatad ni Police Staff Sergeant Allan Divina a saan nga isuda ti kwestyunaran na no di ket dagiti mismo a nangisayangkat ti operasyon.
Naamoan a nangisayangkat ti operasyon dagiti kameng ti pulisya kalpasan nga adda dagiti maaw-awat da a report a no mumalemen ket adda dagiti maipagarop nga agsusugal iti compound ti pamilya Ramos iti nadakamat a barangay.
Ginandat ti Bombo Radyo Laoag nga alaen ti kabibiangan dagiti suspek ngem nagkedked dagitoy a nagsarita.
Iti agdama, nagtalinaed iti kustodyar ti PNP Laoag dagiti suspek kabayatan ti pannakaisagana dagiti dokumento para iti pannakaipila ti reklamo kontra kadakuada.
