LAOAG CITY – Inbatad ti maysa a registered nutritionist ken dietitian a ni Jeaneth Aro a ti frozen veggies ket addaan ti nangato a nutrisyon a kas met laeng kadagiti presko a nateng.
Ni Aro ket nutrition coach ti Filipino Olympic medalists iti Tokyo ken Paris Olympics.
Inlawlawag na a kalpasan a maapit dagiti nateng ket mai-flash frozen, a kayatna a sawen ket maikabil a dagus iti extreme cold para iti pannaka-preserbar dagiti taraon.
Malaksid iti pannaka-preserba ti sustansya ti frozen veggies, nababa daytoy iti calories ken nangato iti fiber, isut gapuna nga ideal iti weight management, digestive health, ken blood sugar management a kasapulan dagiti aktibo nga indibidual kas kadagiti atleta.
Inrekomendar ni Aro a nasaysayaat no pilyen dagiti plain variant ti frozen veggies imbes a dagiti adda ti sauce na a mabalin a makaipaay iti nayun nga asin wenno asukar.
