LAOAG CITY – Inpila iti Kamara de representantes ni Nueva Vizcaya Rep Atty. Timothy Joseph Cayton ti maysa a gakat a mangipaay ti hazard pay kadagiti mangmangged.
Daytoy ket gapu ta sumangsango dagiti empleado ti gobierno ti nagduduma a klase ti occupational hazard.
Gagem ti House Bill No. 9809 wenno Local Government Employees Hazard Pay Act of 20265 a maipaayan ti maiparbeng nga hazard pay dagiti empleado ti Local Government Units nga inaldaw a makapaspasar ti naiget a risgo partikular dagiti adda iti disaster response, sanitation, engineering works, environmental hazards, law enforcement, ken uray dagiti mangig-iggem ti napeggad a kemikal.
Iti babaen ti nasao a gakat, ti panangipaay ti hazard pay ket maibasar iti aktuwal a peggad ti trabaho ken saanen nga iti employment status ti maysa a mangmangged.
Gapu iti daytoy, sakupen ti benepisyo dagiti permanent, casual, temporary, contractual, karaman dagiti job order (JO) ken contract of service (COS) employees.
Ilunglungalong pay ti House Bill 9809 ti panangbukel ti maysa a National Occupational Hazard Classification Framework tapno maaddaan ti maymaysa a pagannurutan iti panangestablisar no siasinno dagiti kwalipikado iti hazard pay.
Basar iti nailanad iti guidelines ti gakat, makaawat dagiti empleyado nga adda iti high-risk work ti hazard pay a katukad ti saan a nababbaba ngem 25% ti basic monthly salary da, idinto a 15% met ti para kadagiti adda iti moderate-risk work.
