LAOAG CITY – Inlungalong iti Kamara de Representantes dagiti kongresista a miembro ti makabayan bloc a maipangato iti P2,000 ti agdama a P1,000 a binulan a social pension dagiti marigrigat a senior citizen iti pagilian.
Nakaipalaon ditoy ti House Bill number 10770 nga inpasa da Representatives Antonio Tinio ti ACT Teachers Party-list, Sarah Elago ti Gabriela Women’s party ken Renee Co ti Kabataan Party-list.
Sakupen ti gakat dagiti pensyonado ti Social Security System (SSS) ken Government Service Insurance System (GSIS) a P10,000 wenno nababbaba pay ti maaw-awat iti kada bulan.
Gagem ti gakat a maipaayan ti naig-iget a suporta iti pagsapulan dagiti natataengan a marigrigatan a mangsupusop kadagiti kasapulanda iti baet ti nangato a presio ti taraon, agas, kuryente, danum ken dadduma pay nga inaldaw-aldaw a gastosen.
