LAOAG CITY – Nasarakan ti bangkay ti maysa a senior citizen a lalaki iti uneg ti kwartona iti Barangay 2 iti ili ti San Nicolas.
Basar iti imbestigasyon, ti lakay ket agnanaed iti maysa a family house no sadinno nga adda daytoy iti akin baba a paset ti pagtaengan idinto nga adda met dagiti agkaskasera iti ngatona.
Segun kadagiti agkaskasera, nakitada pay laeng daytoy idi Lunes, Hulio 13, ngem saanen a nakita pay iti agmalem ti Martes, Hulio 14.
Gapu iti daytoy, nagsiddaaw dagiti agkaskasera, aglalo idi adda iti nabangsit a maangot da, rason a pinadas da a napan kinita ti nasao a senior citizen.
Ad-adda manen a nakigtot dagiti agkaskasera idi nakita da a maysan a nalamiis a bangkay ti lakay isut gapuna nga intawag da a dagus iti pamilia na.
Patien ti pamilia ti senior citizen nga adda ti napasamak pay a nangitunda ti pannakatay na gapu ta nakadata daytoy, nakangato ti ima na ken adda ti dara iti agongna.
Naamoan a ti senior citizen ket adda ti asthma-na no sadinno nga agag-agas daytoy.
Iti agdama, manarimaan pay laeng ti imbestigasion ti Philippine National Police (PNP) iti ili ti San Nicolas mainaig iti nasao a pasamak.
