LAOAG CITY – Inyistorya ni Mrs. Marina Viernes iti Barangay Dampig iti ili ti Pagudpud ti kapadasan da iti Mariano Marcos Memorial Hospital and Medical Center iti ciudad ti Batac.
Segun kenni Viernes, iti bigat ti Hulyo 20, Martes ket naganak ti anak na iti nadakamat nga ospital ken iti malem ket inpatulod na ti gamit ti maseknan ken inyawat na iti nurse a binigbig na iti nagan a Honey Rondal.
Karaman iti linaon ti bag nga inyawat na iti nurse ket ules, pungan, cellphone nga agbalor ti 18 a ribo a pisos, charger, jacket ken tsinelas.
Inbatad na nga idi tawagan na ti cellphone a karaman kadagiti inyawat na ket awan ti sumungsungbat ken inpagarop na a madi ti agusar iti cellphone.
Kunana nga idi Huwebes, Hulyo 22 ket adda ti kadua na a maysa met laeng nga ina a tumawtawag iti anak daytoy ken inkiddaw na a damagen no adda ti kadua na a pasyente a Viernes.
Babaen iti daytoy ket nakasarita na ti anak na a naganak ken ditoy a naduktalan na nga awan met ti naiyawat iti daytoy isut gapo na nga inreport na iti guard agingga dimmanon iti Social Welfare iti ospital.
Inlawlawag na nga idi nakita na ti nurse ket dinamag na no sadinno ti ayan na ti inyawat na a gamit para iti anak na ngem maipagarop nga inpapilit ti nurse nga inted na daytoy iti pasyente.
Mainaig iti daytoy, inpetteng met ti mismo a naganak nga awan ti naaw-awat na a gamit na.
Kunana nga agingga a nagawid ti pasyente ket saan dan a nakitkita no ayan ti gamit nan.
Kabayatanna, naamoan na a kastoy met ti kapadasan ti kadua na a pasyente no sadinno a saan met a dimmanon ti sandal na.
