LAOAG CITY – Kalikagom ti gobierno lokal ditoy ciudad ti Batac a mapalawa pay ti produksyon ti kawayan iti nasao a lugar.
Segun kenni Mayor Mark Christian Chua, nagmula da ti 10 ribo a kawayan iti Camandingan babaen ti tulong ti Department of Agriculture.
Kunana a babaen ti ad-ado a mula a kawayan ket ad-ado met dagiti mausar a pagaramid kadagiti nagduduma a banag.
Inbatad na a ti maysa kadagiti ar-aramiden da ket ti panangkita no ania pay dagiti banag a mabalin da nga aramiden babaen iti kawayan.
Naamoan nga addan ti maysa a tawen sipud rinugyan ti gobierno lokal iti ciudad ti Batac ti nagpatanur ti kawayan.
Daytoy ket kalpasan a naobserbaran da a bumasbassiten dagiti agmulmula ti kawayan gapu ti innovation ngem kayat da a palawaen daytoy ta makita da nga ado dagiti mabalin a pakausaran na.
Kabayatanna, adda ti bamboo fiber extract iti Brgy. Mabaleng nga isu ti agdama ita a maus-usar.
Maipalagip a ti tema ti naiyuswat a Farmer’s festival iti ciudad ket “KAWAYAN” gapu ta kayatda a bigbigen daytoy ken ipakita iti publiko a ti ciudad ti Batac ket maysa kadagiti paggap-gapwan ti ado a kawayan.
