LAOAG CITY – Inlawlawag ni Gov. Matthew Marcos Manotoc nga awan ti pakanaiganna mainaig iti isyu ti Bagong Bayaning Magsasaka (BBM) Rice ti National Irrigation Administration ken lokal a gobierno ditoy siudad Laoag.
Daytoy ket kalpasan a napaay ti City Agriculturist ditoy siduad kalpasan a saan a tinungpal ti National Irrigation Adminstration ti kiniddawna a 100 a sako ti Bagong Bayaning Magsasaka Rice.
Segun iti gobernador, awan ti ammo na maipanggep iti daytoy ken ita na laeng a naammoan ti Bagong Bayaning Magsasaka Rice no sadinno immunan a maipagrop nga adda ti pakanaigan iti biang ti gobierno probinsial iti saan a pannakatuloy a panaglako ti National Irrigation Administration ti bagas iti biang ti lokal a gobieno ditoy siudad.
Maipalagip a napaay ni Engr. Shiela Opelac, City Agriculturist kalpasan a saan a tinungpal ti National Irrigation Administration ti kiniddawna a 100 a sako a Bagong Bayaning Magsasaka Rice tapno mailako iti Kadiwa Store iti sangoanan ti City Hall ditoy siudad ti Laoag.
Kunana a nakaawat isuna ti maudi a tawag a mangipakpakaammo a ti Bagong Bayaning Magsasaka Rice ket mailako lattan iti sangoanan ti Kapitolio Probinsial a saan ket di iti sangoanan ti City Hall.
