LAOAG CITY – Kalikagom ti gobierno probinsyal babaen ti Micro Small and Medium Enterprise Office a balbaliw a malukatan ti pasalubong center iti ili ti Badoc.
Segun ken ni Mrs. Elma Gabriel, ti mangidadaulo iti Micro Small and Medium Enterprise Office ditoy probinsya, patien ti gobierno probinsyal a napintas a mamentenar ti nasao a lugar para kadagiti turista.
Inbatad na a kitkitaen da dagiti napintas ken epektibo nga addang tapno masigurado a daywen dagiti turista apaman a malukatan iti maikadwa a gundaway ti pasalubong center iti nadakamat nga ili.
Inadmitir ni Gabriel nga arigna naidardaras ti pannakalukat ti pasalubong center iti umuna a gundaway gapu iti Palarong Pambansa.
Nupay kasta, gapu kadagiti nagsasaruno a bagyo ket naapektaran ti pasilidad a nangitunda ti pannakaisardeng ti operasyon na.
Mainaig iti daytoy, kuna ni Gabriel a plano ti opisina da ti makibinnulig kadagiti kompanya a mangididiaya ti tourist services a namnamaen da a makatulong iti agtultuloy nga operasyon ti pasalubong center.
