LAOAG CITY – Naglikudan da Senate Minority Leader Tito Sotto III ken Senador Ping Lacson ti akusasion ni Senador Imee Marcos nga adda ti plano ti minorya nga ilungalong ti charter change no bilang maala ti numero tapno agbalin a mayorya.
Iti Facebook post ni Sen. Imee, kunana nga adda ti naiwayat a taripnong iti maysa nga hotel ken napagsaritaan ditoy ti panangamendar iti Konstitusion iti babaen ti Constitutional Assembly tapno malappedan ti panagtaray ni Vice President Sara Duterte inton 2028.
Nupay kasta, inpetteng ni Sotto, arig saan nga ammo a dumngeg ti source ti senadora gapu ta awan met ti napagsasaritaan a lappedan ti presidential bid ni Vice President Duterte.
Inpetteng ni Lacson nga awan ti napagsaritaanda a sukatan ti liderato tapno maiduron ti Con-ass ken naan-anay a makumbiktaran ti Bise Presidente.
Innayonna nga ad-adda a kasapulan a trataren ti Solid Bloc 11 wenno SB11 nga ibangon ken rugian manen ti Senado ken panagsukat ti liderato tapno maibangon ti institusion manipud kadagiti nagsasaruno nga isyu.
