LAOAG CITY – Nakigtot ni Gob. Imee Marcos iti napasamak idiay Brgy. Capas, Agoo ti probinsia ti La Union.
Impalgakna a saanna a pulos a ninamnama ti pannakapasamak ti nasao a kinadamsak a nakapapatayan ni dati a Cong. Eufranio “Franny” Eriguel.
Pakaseknan daytoy, mamati ti gobernador a babaen iti naiget a pannakikammayet dagiti nakaimatang iti nasao a pammapatay kadagiti otoridad ket matiliw ti responsable iti pannakapapatay ti dati a diputado.
Imbatadna nga ania man ti makagapu, personal, pulitika, negosio wenno ania man a rason ket agballigi ti pulisia a mangammo iti pudno nga adda iti likud ti nasao nga insidente.
Impetteng ni Gob. Marcos a saan a rumbeng a mapasamak ti ania man a klase ti kinadamsak.
Maipalagip a ti gobernador ti agdama a chairman ti Regional Peace and Order Council ditoy rehyon uno.
