LAOAG CITY – Inpasingked ni Governor Cecilia Araneta-Marcos a nakasaganan ti gobierno probinsyal iti possible nga epekto ti bagyo Uwan ditoy probinsya.
Inbatad na a narwamen ti probinsya kadagiti mapasaran a kalamidad kas ti bagyo isut gapuna nga ammon dagiti maseknan nga ahensya ti gobierno ti ar-aramiden da.
Kuna na nga uray dagiti kasapulan nga equipment ket nakasaganan tapno adda ti dagus nga usaren no kumaro ti sitwasyon.
Nagpanawagan pay ti gobernador a no kasapulan nga adda ti dumalan ti preemptive evacuation ket agtungpal koma a dagus tapno maliklikan ti pannakairisgo ti biag, saan laeng a dagiti marespondean no di ket uray pay dagiti rescuers.
Immunan nga indeklarar ni Governor Marcos ti pannaka-kanselar ti klase iti amin a lebel iti pampubliko ken pribado a pagadalan ditoy probinsya intono Nobyembre 10-11 gapu iti bagyo Uwan.
Karaman pay a sinuspenso ti gobernador ti serrek iti trabaho iti gobierno intono Lunes, Nobyembre 10.
