LAOAG CITY – Umabot ti nasurok a 10 dagiti naikkan ti ticket gapu iti kinaringgor ti motorsiklo da iti Vintar, Ilocos Norte.
Daytoy ti inbatad ni Police Major Joseph Baltazar, ti chief of police iti ili ti Vintar.
Inlawlawag iti Bombo Radyo Laoag ni Baltazar nga adda dagiti grupo ti lallaki a nagpakada iti opisina da a manglawlaw iti ili ti Vintar kas paset ti panangselebrar da ti baro a tawen.
Kuna ti opisyal nga inpagarop da nga agparada laeng dagiti maseknan ngem nagusar met dagitoy iti naringgor a tambutso.
Inpakaammo pay ni Baltazar a mismo a ni Provincial Director Cesar Pasiwen ti nagtext kenkuana nga adda dagiti aglulumba iti ili ti Vintar.
Gapu iti daytoy, nagturong a dagus dagiti kameng ti pulisya iti nadakamat a lugar ken tiniliw da dagiti maseknan.
Inpetteng ni Baltazar nga awan ti rason tapno agriringgoren dagiti maseknan gapu ta saan pay a nadanun ti panagsina ti daan ken baro a tawen idi inaramid da daytoy.
Inkalintegan na pay nga adda ti sabali a wagas a mangparnuay ti ringgor dagiti maseknan kas ti panagbusina, saan ketdi a ti panagusar ti naringgor a tambutso.
Iti dayta met laeng a gundaway ket naikkat ti naringgor a tambutso dagiti maseknan ken kinumpiskar pay laeng dagiti kameng ti pulisya.
