LAOAG CITY – Agtultuloy a makapasar ti panagtudo ti sumagmamano a paset ti Luzon ita nga Huebes, Agosto 13 gapu iti Southwest Monsoon wenno Habagat, basar iti Philippine Atmospheric, Geophysical and Astronomical Services Administration (PAGASA).
Manamnama ti sagpaminsan a panagtudo idiay Zambales ken Bataan idinto a makapasar ti naulep a tangatang ken panaggurruod idiay Metro Manila, Ilocos Region, Cordillera Administrative Region, Cagayan Valley, CALABARZON, MIMAROPA ken dadduma pay a paset ti Central Luzon, Camarines Norte, Aklan, Antique ken Capiz gapu pay laeng iti Habagat.
Iti dadduma pay a paset ti Luzon, agbalin nga apagapaman a naulep ti tangatang nga addaan ti isolated rain showers.
Iti Mindanao ken dadduma pay a paset ti Visayas, manamnama ti apagapaman agingga a naulep ti tangatang nga addaan ti isolated rain showers wenno thunderstorms gapu iti localized thunderstorms.
Kabayatanna, agtultuloy nga imon-monitor ti PAGASA ti Tropical Storm Nangka nga adda iti ruar ti Philippine Area of Responsibility (PAR).
Alas-3:00 ti parbangon, naudi a nasaripatpatan ti bagyo iti kaadayo a 2,560 a kilometro iti daya amianan a daya iti ungto ti Northern Luzon.
Addaan daytoy ti maximum sustained winds nga 65 a kilometro iti kada oras ken aggargaraw iti amianan a daya nga addaan ti kapaspas a 20 a kilometro iti kada oras.
