LAOAG CITY – Nagballaag ti health expert iti publiko a saan nga agpangadua nga agturong iti ospital no makapasar ti sintomas iti baet ti panagngato ti kaso ti dengue.
Inbatad ni Dr. Rontgene Solante ti San Lazaro Hospital, no naggurigor iti uneg ti tallo nga aldaw nangruna kadagiti ubbing ket nasken nga itaray dagitoy iti ospital.
Kuna ni Solante a no nakasangpeten iti ospital, maiwayat ti kumpleto a blood count (CBC) ken mabantayan ti hematocrit level ken platelet count.
Inlawlawagna no nababa ti platelet ken nangato ti hematocrit, maysa daytoyen a warning signs ti dengue isu a saanen a mapalubusan pay a tumalaw ti pasiente iti ospital.
Kabayatanna, inpakaammo pay ni Solante a ngumatngato dagiti kaso ti dengue kadagiti dadduma a lugar.
