LAOAG CITY – Nagballaag ti Food and Drug Administration kadagiti umin-inum ti herbal dietary supplement a pampapigsa iti libido kalpasan ti panangtingiting iti sumagmamano a bansada a nagpositibo iti sildenafil citrate, maysa a prescription drug a maus-usar iti panagaggas iti erectile dysfunction kadagiti lallaki a maipawil kadagiti food supplement.
Ti nalatak a brand name ti agas ket Viagra.
Basar iti Food and Drug Administration Advisory No. 2025-0365 a pinirmaan ni Food and Drug Administration Director General Dr. Samuel Zacate, laboratory analyses ti Drivemax Plus Brand, ti herbal dietary supplement capsules a karaman kadagiti sumaganad a numero ti lot ken petsa ti panag-expire ket nangipakita dagitoy a naglaon ti sildenafil citrate: 24581626 (Abril 5, 2026); 23521625 (Agosto 8, 2025); 23551625 (Nobiembre 8, 2025); ken 24561626 (Enero 22, 2026).
Inbilin ti Food and Drug Administration dagiti amin a law enforcement agencies ken local government units a siguradoen a saan a mailako dagiti nasao a produkto iti tiendaan wenno dagiti lugar a sakupenda.
Naammoan a dagiti umin-inum ti adulterated a Drivemax capsules ket naabisoan met nga agpakonsultar iti doktor para iti aniaman a side effect daytoy kas ti panagsakit ti ulo, panagbawas, panagulaw wenno lightheadedness, urinary tract infection, priapism (prolonged erection), indigestion, nasal congestion, rashes ken panagbalbaliw ti vision wenno kellaat a sumipnget ti panagkita.
Basar iti website daytoy, ti Drivemax ket maysa a dietary supplement para kadagiti lallaki ken babbai a naaramid tapno tapno masolbar ti bumabbaba a sexual performance iti babaen kadagiti natural a ramen kas ti horny goat weed, ginseng, Tribulus terrestris, tongkat ali ken Gingko biloba.
