LAOAG CITY – Naideklarar ti High Security Alert iti intero a Bangladesh gapu iti kumarkaro nga engkwentro iti nagbaetan dagiti estudyante ken pulis.
Basar iti report, arigna internet blackout aminen iti intero a ciudad ti Dhaka a kabisera ti Bangladesh, ken saanen a mausar dagiti cellphone gapu ta awanen ti signal da.
Immuna iti daytoy, rinibo a demonstrador ti rimaot iti state broadcaster BTV, dinadael da dagiti kagamitan na binubuong da dagiti tawa ken silaw, ken pinuuran da pay daytoy.
Inpakaammo ti Information Minister ti Bangladesh a ti National TV ket nagsardeng ti operasyon na ken kaadoan kadagiti empleado ket pimmanaw dan iti pasdek.
Maipalagip a sakbay ti pannakauram ti National TV ket nagparang ni Prime Minister Sheikh Hasina iti network tapno umapela ti panagbalin a natanang kalpasan ti sumagmamano nga aldaw a nadamsak a tignay protesta a nakatayan ti 19 a tattao ken nakasugatan ti 100 a sabsabali pay.
Narubruban ti pungtot dagiti estudyante a nangitunda ti nadamsak a tignay protesta gapu iti sistema ti panagala ti trabaho a base iti merit.
