LAOAG CITY – Pinapigsa pay ti House prosecution panel ti legal team da kalpasan a naiyam-ammo ti maikadwa a batch ti private prosecutors a tumulong iti panangusig ken ni Vice President Sara Duterte iti umadanin nga impeachment trial iti Senado.
Karaman kadagiti baro a private prosecutors da:
1. Atty. Theodore Te
2. Atty. Reynaldo Robles
3. Atty. Arnold Labay
4. Atty. Mae Divinagracia
Segun iti House prosecution, dagiti uppat nga abogado ket addaan ti nalawa a kapadasan iti constitutional law, criminal ken civil litigation, election law, corporate law, human rights, ken legal education.
Makadwa da pay ni Atty. Benjamin Tolosa ken ti immuna a grupo ti sangapulo a private prosecutors iti panagpila ti ebidensya kontra iti bise presidente.
Sangwen ni Vice President Duterte ti impeachment trial mainaig kadagiti alegasyon ti maipagarop a saan nga umiso a panangusar ti P612.5 milyon a confidential funds, saanna nga indeklarar ti usto nga Statement of Assets, Liabilities and Net Worth (SALN) na, saan a mailawlawag a kinabaknang na ken dagiti pangta na kontra kada Presidente Ferdinand Marcos Jr., First Lady Liza Araneta-Marcos, ken dati nga House Speaker Martin Romualdez.
