LAOAG CITY – Inbatad ti House prosecution panel nga awan pay ti pinal a desisionda mainaig iti panangi-share ni Senator-Judge Pia Cayetano ti spliced ken edited video iti nagbalin a panagsinnungbat da Senador Alan Cayetano ken Rep. Chel Diokno iti impeachment trial.
Iti pannakisarsarita ti Bombo Radyo ken ni Lead Prosecutor Rep. Gerville Luistro, inpettengna nga ammo dagiti miembro ti panel ti inaramid ti nasao a senator-judge, karaman dagiti komento ti publiko.
Nupay kasta, saan pay a nakabukel ti pinal a desision wenno posision ti House panel mainaig iti kontrobersial a video.
Mainaig iti daytoy, nasaludsod pay iti agpanpanday linteg tiposibilidad ti pangiprisintarda ti nasao nga insidente iti Senate impeachment court.
Segun ken ni Luistro, awan pay ti aktwal a posision ti House panel ngem inpettengna nga manarimaan ti panangtingitingda kadaytoy nga insidente.
Iti baet daytoy, inpanagetget ti House panel a masapol a suruten ti prosecutor-defense ti umno a panangiprisintar dagiti ebidensia iti agtultuloy a trial kontra ken ni VP Sara.
Inlawlawagna a nasaysayaat para kadagiti senator-judge ken iti viewing public no kastoy ti agbalin a sistema tapno insigida a maikumparar dagiti ebidensia ken testigo ti dua a Partido.
