LAOAG CITY – Inbatad ni Police Capt. Joseph Tayaban, ti chief of police iti ili ti Badoc a ti kangrunaan a mangmonitor kadagiti Cargo trucks a sumsumrek ditoy probinsya ket dagiti kameng ti Highway Patrol Group (HPG).
Nupay kasta, kuna na a tumultulong da met iti HPG ken adda ti tallo a logbook da a pagilistaan kadagiti sumrek ditoy probinsya.
Inlawlawag na a ti maysa a logbook ket isu ti pakailistaan dagiti otorisado a tattao, ti maikadwa a logbook ket tuck and cargoes idinto a ti maikatlo a logbook ket isu ti pakairekordan dagiti mabalin a maiquarantine kas kadagiti OFWs ken dadduma pay nga aggapo iti sabali a probinsya.
Inbaga ni Tayaban a ti umuna a kitaen da kadagiti sumrek ditoy probinsya ket IATF ID ken no adda daytoy ket saan dan a pagbayagen dagiti maseknan iti checkpoint tapno saan a mangitunda ti trapiko.
Kabayatanna, inbaga na a ti taga Barangay Davila iti ili ti Pasuquin a maibagbaga a nakalibas a simrek ditoy probinsya ket nakarekord kadakuada ken ti naipan iti logbook da ket pahinante iti maysa a planta idiay Pampanga ken adda pay kadakuada ti plate number ti nagluganan na.
Binigbig ni Tayaban ti lalaki a taga Barangay Davila iti ili ti Pasuquin a ni Alwyn Agag.
Inpasingked met ti opisyal a makikoordinar da iti HPG tapno saanen a basta makapan iti sabali a lugar ti nagluganan a Truck ni Agag.
Inadmitir ni Tayaban a ti problema ket awan ti ID dagiti pahinante kadagiti cargoes ken delivery trucks.
