LAOAG CITY – Nagkedked ti International Criminal Court (ICC) iti kiddaw ni dati a Presidente Rodrigo Duterte a temporario a mawaya-wayaan kabayatan a matingtingiting dagiti kaso kontra kenkuana.
Basar iti Pre-Trial Chamber I ti International Criminal Court, nagtalinaed a kasapulan ti pannakaibaludna kas maiyataday iti probision ti Rome Statute.
Iti desision ti korte, inpettengna a ti agtultuloy a pannakaibalud ni Duterte ket nainkalintegan basar iti kadagsen dagiti akusasion, masapul a masigurado a sumango isuna kadagiti imbestigasion ken tapno maliklikan ti posible a panagserrek iti imbestigasion wenno pangta kadagiti biktima ken saksi.
Ni Duterte ket adda iti babaen ti International Criminal Court iti The Hague sipod pay idi Marso 2025 mainaig iti tallo a bilang ti murder a maibilang a “crimes against humanity” gapu iti kontrobersial a kampania kontra iti droga idi panawen ti panagserbina.
Nangipila ti kampo ti dati a Presidente ti petision idi Hunio para iti temporario a pannakawaya-wayana babaen kadagiti rason kas ti maipagarup a nakapsoten ti salun-atna ken kinakurang iti kabaelan a sumango iti imbestigasion.
Inbatad dagiti abugadona a saan a kontra iti agdama nga administrasion iti temporario a pannakawaya-wayana ngem naglikudan met laeng daytoy ti Malacañang.
Kinontra ti Office of the Prosecutor ti International Criminal Court iti kiddaw ken inpettengna a nasken a dumalan iti nauneg a panangtingiting kadagiti alegasion mainaig iti salun-at ni Duterte.
Nangipeksa pay ti panagamak ti Office of Public Counsel for Victims iti posible a pannakaitantan ti hustisia para kadagiti pamilia dagiti biktima ti gubat kontra iti droga.
