LAOAG CITY – Nangipila ti prosecution panel ti International Criminal Court (ICC) ti maikadua nga updated list of evidence kontra ken ni dati a Presidente Rodrigo Duterte basar iti pammilin ti Pre-Trial Chamber idi Pebrero 10, 2025.
Basar iti notification ti International Criminal Court, adda ti dua a baro nga item a nainayon kontra ken ni Duterte ngem nagtalinaed a confidential ti annex gapu ta naglaon daytoy ti sensitibo nga impormasion dagiti testigo.
Rimmuar ti update sumagmamano nga aldaw kalpasan a pinalubosan ti Pre-Trial Chamber ti kapada a prosecution ken defense a mangipila ti baro nga ebidensia.
Maipalagip a ni Duterte ket inarestar idi Marso 11, 2025, apaman a simmangpet manipud idiay Hong Kong kas paset ti imbestigasion ti International Criminal Court iti maibilang a “war on drugs.”
Basar iti warrant ti International Criminal Court, maipagarup a nangaramid, nangpundo ken nagarmas ni Duterte ti death squads a karaman iti panangpapatay kadagiti mapagat-atapan a drug users ken dealers.
Naiturong daytoy idiay The Hague iti kapada nga aldaw ken nagpakita iti korte iti babaen ti video link idi Marso 14.
Mainaig iti daytoy, namin-adu a daras a nagkedkedan ti Pre-Trial Chamber ti kiddaw ti defense ti dati a Presidente para iti interim release.
Inkeddeng met ti Pre-Trial Chamber ti confirmation of charges hearing para ken ni Duterte inton Pebrero 23 agingga iti 27, 2026 idiay The Hague no sadinno a ditoy a mangiyetnag ti desision no umdas ti ebidensia tapno naan-anay nga ituloy ti kaso kontra kenkuana.
Ti addang ket paset ti agtultuloy nga imbestigasion ti International Criminal Court kadagiti alegasion ti human rights violations idi panawen ti panagserbi ni Duterte kas dati a Mayor ken Presidente ti Pilipinas.
