LAOAG CITY – Ginutigot dagiti prosecutors ti International Criminal Court (ICC) dagiti judges a saan a patgan ti kiddaw ni dati a Presidente Rodrigo Duterte nga itantan nga awan ti deadline ti kaso kontra ken ni Duterte.
Basar kadakuada, saan nga umdas ti alegasyon ti naiget a pannakapukaw ti memorya ken ti panagkapuy ti cognitive na tapno ibaga a saanen a mabalin a sumango iti trial.
Iti inpila a dokumento idi Setyembre 11, inbatad ti International Criminal Court – Office of the Prosecutor a saan nga umdas dagiti report ti defense team ni Duterte tapno isardeng ti proseso.
Plano met dagiti prosekusyon ti mangala ti bukod da a medical expert tapno maestablisar no kabaelan wenno saan ni Duterte ti makipaset ti trial.
Innayon da a ti panagbalin a “fit to stand trial” ket saan a pagibasaran laeng ti kaadda ti sakit no di ket iti kabaelan ti akusado nga awaten dagiti kaso kontra kenkuana, tingitingen ti ebidensya, ken ipaayan ti direksyon ti abogado na.
Inpetteng ti prosekusyon a ti pannakaitantan ti trial ket masapol a limitado laeng iti panawen a kasapulan para iti medikal a pannakatingiting.
Kalikagom da pay a makumpleto ti confirmation of charges hearing sakbay nga agngudo ti 2025.
Kabayatanna, inpetteng ti kampo ni dati Presidente Duterte a saannan a kabaelan ti dumalan iti trial gapu iti “cognitive impairment.”
Kuna ti abogado na a ni Nicholas Kaufman, saanen a malagip ni Duterte ti napapateg nga impormasyon, uray dagiti tattao a nasinged kenkuana no sadinno nga uray ti proseso ti kaso ket saanna a maawatan.
Basar met kadagiti report ti defense medical expert, karaman ti maysa a neuropsychologist ti International Criminal Court, saanen a kabaelan ni Duterte ti makipaset iti aniaman a legal a panagdengngeg, ken uray ti sitwasyon na ket namnamaen a saanen nga agimbag pay.
Maipalagip a temporaryo nga intantan ti Pre-Trial Chamber ti naikeddeng koma a panagdengngeg intono Setyembre 23 kabayatan a maiyur-uray ti desisyon mainaig iti isyu ti salun-at ti dati a presidente.
