LAOAG CITY – Target dagiti prosecutors ti International Criminal Court (ICC) a mangrugi intono Nobyembre 2026 ti panangusig ken ni dati a Presidente Rodrigo Duterte mainaig kadagiti kaso a Crimes against humanity nga adda ti pakainaigan dagiti napasamak a pammapatay iti babaen ti nadara kampanya kontra droga idi administrasyon na.
Iti naisumitir a report idi Mayo 15, inbatad ti prosekusyon a namnamaen da a malpas ti amin a kasapulan a panagsagana sakbay nga agngudo ti Setyembre 2026.
Gapu iti daytoy, ilunglungalong da ti Nobyembre 30 iti agdama a tawen a pormal a panangiyuswat ti trial tapno maaddaan pay ti umdas a panawen tapno maurnus dagiti ebidensya ken panangisagana kadagiti dokumento.
Kabayatanna, nasapsapa met nga iskedyul ti kalikagom dagiti abogado dagiti biktima ti kampanya kontra droga.
Para kadakuada, ad-adda a nainkalintegan no dagus a mangrugi ti trial tapno mapaalisto ti pannagna ti kaso ken maikkan ti gundaway ti dadduma pay a biktima a makipaset iti proseso.
Kabayatanna, linukatan manen ti depensa ni Duterte ti isyu ti sitwasyon ti salun-at ti dati a Presidente.
Segun iti baro a legal counsel a ni Peter Haynes, kasapulan a tingitingen manen no kabaelan pay ti dati a presidente ti sumango iti trial gapu iti maipagarop a panagkapuyen ti kondisyon na.
Inpetteng ti depensa a saan nga umdas dagiti immunan a pannakatingiting ti salun-at na a naaramid iti umuna a paset ti kaso, ken masapol a marepaso daytoy sakbay nga ikeddeng ti panangusig kenkuana.
Maipalagip nga idi Abril 23, kinumpirmaran ti korte dagiti kaso kontra ken ni Duterte kalpasan a naideklarar a “fit to stand trial” basar iti pannakatingiting ti salun-at na.
Inyakar met ti International Criminal Court ti kaso manipod Pre-Trial Chamber I naiturong iti Trial Chamber III kas panagsagsagana iti sumaruno a chapter ti trial.
Sumangsango ni Duterte iti tallo a bilang ti murder ken attempted murder kas crimes against humanity gapu iti maipagarop a pammapatay a napasamak idi mayor daytoy iti Davao City ken nagbalin a presidente ti Pilipinas iti babaen ti kampanya kontra droga.
