LAOAG CITY – Puntiria ti ili a Badoc a maagaw ti korona iti Tan-ok ni Ilocano Festival of all Festivals ita a tawen 2019.
Segun ken ni Municipal Tourism Officer Mr. Cesar Jade Raquel, insaganaan a naimbag ti ili da ti nasao a kompetision.
Mamati a kalpasan ti sumagmamano a tawen a nakagungun-ud da iti pammadayaw ket panawenen tapno maiyalat da ti kampeonato.
Nupay kasta, kunana a kinaritna dagiti mangibagi iti ili a mangaramid iti amin a kabaelan da a mangabak gapu ta sigurado a no kasano ti kinapinget ti tarigagay da ket kasta met kadagiti dadduma nga ili ken siudad.
Imbatadna nga intaleknan ken ni La Virgen Milagrosa de Badoc no ania ti maiyannatup a para iti ili da.
Mainaig iti daytoy, nagapela kadagiti kailianna a mangikarkararag iti panangabak ti ili da ita a tawen.
Immun-una ngem iti daytoy, impeksa ti gobierno probinsial ti panangnamnamana nga ad-adda pay a pinapintas dagiti nadumaduma nga ili ken siudad ti presentasyon da ita a tawen nangnangruna ket daytoy ti pangserra nga aktibidad iti “bicentennial celebration” ti Ilocos Norte.
Maipalagip a ti defending champion ket ti ili nga Adams a nangipaneknek itay napalabas a tawen a nupay bassit da nga ili ket kabalinan da ti mangabak.
