LAOAG CITY – Inpasingked ni Police Major Rommel Ramos, ti chief of police iti ili ti Bacarra nga agtultuloy ti naiget a panangmonitor da kadagiti illegal a pagsusugalan iti nasao nga ili.
Segun ken ni Ramos, inpalubos idi ni dati a mayor Nicomedes dela Cruz ti ay-ayam a majong no adda ti minatay iti ili ti Bacarra ngem masapol a dua laeng a lamisaan.
Nupay kasta, kuna ti opisyal a masapol a daytoy ket “friendly game” laeng tapno adda ti pagliliwaan dagiti mapan makiminatay ken saan a pagbalinen a negosyo.
Mainaig iti daytoy, nagpanawagan ni Ramos kadagiti residente a tumulong nga agmonitor ken no adda dagiti makita nga agsusugal iti lugar da ket ireport da laeng iti opisina da.
Nagpalagip ni Ramos a naiget a maipawil ti illegal a panagsusugal isut gapuna a masapol a saan nga ar-aramiden daytoy dagiti residente iti ili ti Bacarra.
Gapu iti daytoy, nagballaag ni Ramos nga amin a matiliwan da nga agsusugal ket pilaan da ti reklamo.
