LAOAG CITY – Dakkel a tulong a mangitag-ay iti turismo ti sabali manen a pammadayaw a nagun-od ti probinsia.
Daytoy ti inbunannag ni Gob. Matthew Marcos Manotoc kalpasan a ti Ilocos Norte ti Grand Winner iti “Best Tourism Promotions – Brochure Category iti ATOP Pearl Awards 2024.”
Segun iti Ilocos Norte Tourism Office, kangrunaan a naitampok iti nasao a brochure ket ipamatmatna a maiyannatup unay ti Ilocos Norte a maysa a lugar a rumbeng a pasiaren ti asino man.
Naipalaon pay ditoy ti QR code a mangidiaya iti alisto a pannakaammo kadagiti inpormasyon mainaig iti turismo.
Inbunannagda a ti nasao nga “innovative design” ket saan laeng nga agserbi a mangiwanwan ngem babaen laeng iti daytoy ket marikna ti arigna pannakapadasen a nagturong kadagiti napipintas a lugar iti probinsia nga arigna mangikonektar kadagiti managpasiar iti probinsia babaen laeng iti panag-scan.
Malaksid iti nasao a pammadayaw, naiyalat pay ti probinsia ti 2nd runner up iti Best Tourism Promotions – Video Category, 2nd runner ti Best Tourism-Oriented LGU ken 2nd Runner Up – Best Cultural Festival: Tan-ok ni Ilocano.
Dagiti nadakamat a pammadayaw ti mangipamatmat iti kinapudno ti tarigagay ti Ilocos Norte Tourism Office a mangitandudo ti probisnsia a maysa kadagiti napintas a lugar a pagpasiaran dagiti turista.
Kabayatanna, kinablaawan ti gobernador ti siudad ti Batac iti pannakagun-udna iti First runner-up iti Best Tourism month celebration iti benneg ti independent ken component city category.
Naipaay dagiti nasao a pammadayaw idiay Koronadal City, South Cotabato.
