LAOAG CITY – Paim-imbestigaran ni Bagong Henerasyon Partylist Rep. Robert Nazal ti implementasion ti Anti-Hospital Deposit Act pakairamanan dagiti pagannurotan ti PhilHealth ken dadduma pay nga adda ti pakainaiganna iti healthcare laws, rules, regulations ken policies.
Kagiddan daytoy ti nag-viral a panagpakamatay ti maysa a lalaki nga addaan ti brain hematoma a basar iti asawana ket saan nga insigida a naoperaan gapu ta awan ti dakkel a gatad a kuartada para iti panangdeposito iti ospital.
Segun iti misis ti biktima, awan ti naalada a benepisio iti PhilHealth gapu ta saan nga immabot ti 24 nga oras a nagtalinaed iti ospital ti pasiente.
Inpetteng ni Nazal a naiget a maipawil ti agsingir ti deposito sakbay nga awaten ken tamingen ti maysa a pasiente.
Innayonna a gagem ti iwayat nga imbestigasion ti Kamara de Representantes a maammoan no umdas ken masursurot dagiti maipatpatungpal a mekanismo ken pannusa kadagiti aglablabsing iti linteg ken pagalagadan ti PhilHeath.
