LAOAG CITY – Nasakit ti nakem ti maysa nga ina a residente iti Barangay 9 iti ili ti San Nicolas kalpasan ti ibilang na a pannaka-discriminate da iti Laoag City General Hospital (LCGH) ditoy ciudad ti Laoag.
Napasamak daytoy idi intaray da ti anak na iti nasao nga ospital ngem maipagarop a saan a pulos a tinaming ti nasao nga ospital kalpasan a naamoan da a taga Barangay 9 da iti ili ti San Nicolas.
Maipalagip a ti nasao a barangay ket addaan ti kaso ti covid-19.
Inistorya iti Bombo Radyo Laoag ti saanen a nagpabigbig nga ina ti nagbalin a kapadasan da iti LCGH no sadinno a kunana nga idi nakadanun da iti nasao nga ospital ket dinamag da no taga ano dagitoy ken idi inbaga da ti lugar da ket naibaga ti maysa a guwardya nga adda ti kaso ti covid-19 iti nasao a barangay.
Inbaga ti ina nga idi met rimuar ti maysa a nurse ket inbaga na nga awan ti isolation iti ospital a pangikabilan da ti anak na.
Kuna ti ina a namindua da a napan iti nasao nga ospital ngem maipagarop a saan da a pulos a tinaming ti anak na ken nagpatingga da laeng iti ruwar ti LCGH.
Innayon na nga idi naudi a napan da iti ospital ket dinamag da laeng no ania ti sakit ti anak na ket inbaga na a nasakit ti rusok na ken saan a makaanges gapu ta adda ti gastritis na.
Malaksid iti daytoy, agyellow pay ti mata ti anak na ken agkapsot ngem saan latta a tinaming wenno chineck-up gapu ta maymaysa laeng ti patien na a rason, daytoy ket ti kaadda ti kaso ti covid-19 iti barangay da.
Gapu iti daytoy, napan da iti maysa a pribado nga ospital nga isu ti nangtaming iti anak na.
Inpakaammo pay ti nasao nga ina a negatibo iti HEPA ti anak na.
Kabayatanna, inkalintegan ni Doctor Elizer Asuncion, ti chief of hospital iti Laoag City General Hospital (LCGH) ditoy ciudad ti Laoag dagiti empleado iti nasao nga ospital.
Inbaga na a saanna a patien a saan a tinaming ti nurse a nakaduty ti anak ti nagreklamo nga ina a taga Barangay 9 iti ili ti San Nicolas.
Inbatad na a basar iti palawag kenkuana dagiti maseknan nga empleado ti LCGH, nakita da a yellowish ti mata ti pasyente isut gapuna a naibaga da nga addaan daytoy ti sakit a jaundice.
Gapu iti daytoy, kuna ni Asuncion nga inbalakad dagiti tao da a mapan dagiti maseknan iti sabali nga ospital.
Kinumpirmaran met ni Asuncion nga awan ti isolation room iti LCGH iti agdama gapu ta agkurkurang da pay ti kwarto para kadagiti pasyente iti nasao nga ospital.
Innayon na a saan da a basta agawat ti pasyente ken agikabil kadagiti gagangay laeng a kwarto gapu iti agdama a mapaspasaran a covid-19 pandemic.
Inpetteng na a gapu iti covid-19 pandemic ket kalikagom da a nadalos a kanayun ti ospital gapu ta saan laeng a para kadagiti personnel no di ket uray dagiti pasyente, aglalo dagiti agdialysis, dumalan ti chemo-therapy ken dadduma pay.
Kabayatanna, para ken ni Asuncion ket awan ti makita na a napasamak a diskriminasyon mainaig iti saan a panangawat ti ospital iti pasyente a taga Barangay 9 iti ili ti San Nicolas.
