LAOAG CITY – Agtultuloy ti naiget a kooperasion ti Ilocos Norte Electric Cooperative wenno INEC kadagiti Local Government Units babaen ti panangpapintasda kadagiti electrical system.
Basar iti kooperatiba, daytoy ket tapno masigurado a napintas ti pannakaidanon ti power supply nangruna no adda dagiti aktibidad.
Naammoan a kas ti pannakaisayangkat ti tinawen a piesta iti ili ti Marcos ken ti manarimaan a pannakitinnulongda iti ili ti Pinili tapno mapapintas pay dagiti pasilidad a mangpasilaw iti nasao nga ili.
Mainaig iti daytoy, bimmisita ti lokal a gobierno iti opisina ni Mr. Perry Martinez, Acting General Manager ti Ilocos Norte Electric Cooperative tapno pagsasaritaanda ti nasao a banag.
Kalikagum dagiti Local Government Unit nga ad-adda pay a lumawag iti pampubliko a lugar, agtalinaed ti kinatalna ken kinatalged ti nasao nga ili.
Mamati ti kooperatiba a babaen iti daytoy nga addangda ket agtultuloy ti panagprogreso ti komunidad.
