LAOAG CITY – Kalikagom ti Ilocos Norte Electric Cooperative nga idadaulwan ni Acting General Manager Cipriano “Perry” E Martinez III a maipababa pay ti 10 pesos ti kada kilowatt hr iti singir ti kuryente ditoy probinsya.
Maipalagip a manipod ti 14 a pisos iti kada kilowatt hr ket bimmaba iti 11.5517 a pisos iti kada kilowatt hr gapu ta limmaka ti pananggatang ti Ilocos Norte Electric Cooperative iti suplay ti kuryente iti San Miguel Cooperative.
Mainaig iti daytoy, kalikagom ni Martinez a maipababa pay iti 10 a pisos iti kada kilowatt hr gapu ta ado dagiti maestablisar a solar pannels ditoy probinsya.
Inpakaammo ni Martinez nga iti agdama ket dandanin agpada ti presyo ti kada kilowatt hr ti kuryente ti Ilocos Norte Electric Cooperative iti Manila Electric Company a 11 a pisos.
Kabayatanna, kalikagom pay ni Martinez a maisubli ti 5,000 a pisos a rice allowance benefits dagiti empleado kadagiti sumarsaruno a bulan.
Inbatad na nga agkasapulan ti kooperatiba ti 170 a milyon a pisos para iti retirement benefits dagiti empleyado a nagretiron.
Saan metten a dinakamat pay ni Martinez no sadinno ti pangalaan ti kooperatiba iti mausar a pondo.
