LAOAG CITY – Nagtalinaed a kababaan ti “residential electricity rate” iti intero a Luzon ti Ilocos Norte Electric Cooperative ken maika-17 a kababaan kadagupan dagiti amin a “distribution utilities” iti sapasap a pagilian.
Daytoy ti inpannakkel ni Mr. Cipriano “Perry” Martinez III, general manager ti Ilocos Norte Electric Cooperative.
Inbatad na a daytoy ti rason a binigbig manen ti Department of Energy ti kooperatiba a maysa kadagiti “top distribution utilities” nga addaan ti kababaan ti “residential electricity rate” iti napalabas a bulan ti Mayo.
Kuna na a kaipapanan daytoy a tallon a bulan a diretso a karaman ti INEC kadagiti bigbigbigen ti DOE nga addaan ti kababaan ti “residential electricity rate” iti pagilian.
Inbunannag ni Martinez a kaipapanan ti sumaysayaat a situasyon ti INEC ti kinapursigido ti INEC a mangpatalinaed iti kinababa ti “rate” ti elektrisidad ditoy probinsia a kabaelan ti tunggal maysa nga Ilocano.
Naammoan a ti “residential rate” ti INEC sakbay pay dagiti buis ken dadduma pay a masapul a mabayadan ket Php 10.1399 iti kada kilowatt hour nupay ti “actual residential electricity rate” idi bulan ti Mayo ket Php 11.2872.
Inpanamnama ti general manager nga agtultuloy ti panangikarigatan ti INEC tapno mapagtalinaed a nababa ti pagbayad ti kuryente bayat ti panangisigurado da a natalged, mapangnamnamaan ken dekalidad ti serbisio nga ipapaay da kadagiti amin a balay ken komunidad iti Ilocos Norte.
Inulit ni Martinez ti nagyaman iti agtultuloy a suporta ken panagtalek dagiti nasursurok ngem sanga gasut siyam a pulo a ribu a Member Consumer Owners wenno MCO’s iti intero a probinsia.
