LAOAG CITY – Kinumpirmaran ni Police Lt. Nelson Pantonia, Asst. Chief ti Laoag International Airport Station nga innem a kakadwa na ti nagpositibo iti covid-19.
Segun kenni Pantonia, dimmalan da a 29 a personnel iti swab test kas mandar ti higher office da.
Inbatad na a dagiti nagpositibo ket dua manipud ditoy ciudad ti Laoag, maysa iti ili ti Paoay ken dagiti tallo ken naggapo iti probinsya ti Ilocos Sur ken Abra.
Kunana a kalpasan a naamoan da a nagpositibo dagiti kakadwa na iti virus ket dagus da met a namandar nga ag-isolate iti laksid a negatibo ti resulta da iti swab test.
Naamoan nga agarop 40 da a personnel a naka-isolate ken saan da pay laeng a mapalubusan a rumwar.
Mainaig iti daytoy, kunana a ti posible a nakaakaran dagiti innem a personnel iti covid-19 ket dagiti pasaheros.
Nupay kasta, inbatad ni Pantonia a manarimaan met ti imbestigasyon no nakaalaan dagiti innem a kakadwa na iti virus.
Kabayatanna, kuna na nga adda ti met back up da a temporaryo a mangsukat kadakuada iti trabaho da ti eropuerto bayat a naka-quaratine da a personnel.
Inlawlawag met ni Mr. Ronald Estavillo, ti manager iti Laoag International Airport nga agtultuloy latta a nakalukat ti opisina iti eropuerto tapno maipayaan latta ti serbisyo dagiti tattao pakairamanan dagiti eroplano.
Segun kenni Estavillo, adda dagiti naka-work from home ken adda met latta dagiti simrek iti opisina.
Inbatad na nga idi naamoan da ti panagpositibo dagiti innem a kameng ti PNP a miembro iti Aviation Security Group ket dagus a nakitaripnong daytoy kadagiti head dagiti personnel para iti daytoy.
Kunana a dagiti dadduma a personnel ket agtalinaed iti barracks da ken nabarikadaan ti kalsada nga agturong iti daytoy tapno dagiti empleado ket usaren da ti alternate route a mapan iti opisina da kas iti Phil. Airforce Office.
Innayon na a dagiti inaldaw a kasapulan dagiti personnel a naka-quarantine ket magatang babaen kadagiti sumagmamano nga empleado ti CAAP.
Mainaig iti daytoy, kunana a naiyuswat metten ti disinfection babaen kadagiti kameng ti Bureau of Fire Protection (BFP).
