LAOAG CITY – Nasapa a nagballaag ti Ilocos Norte Police Provincial Office iti publiko ti saan a panagusar iti paputok a boga.
Segun ken ni P/Maj. Sheryl Guzman, pannakangiwat ti Ilocos Norte Police Provincial Office, daytoy a nasapa a ballaag ket napateg unay tapno maipasagepsep kadagiti umili nangruna kadagiti ubbing wenno agtutubo maipanggep iti daytoy a banag.
Inbatadna a naiget ti panangipatungpal ti Philippine National Police daytoy a pagannurutan kas maibasar iti naiyataday iti Provincial Ordinance No. 05-2023 wenno ti Anti-Boga Ordinance in the Province of Ilocos Norte.
Inlawlawagna a no adda dagiti masitada nga ubbing nga aglabsing iti umuna a gundaway ket bagaanda pay laeng dagitoy ngem no ulitenda manen ket mamulta dagiti guardian wenno dagiti nagannakda.
Kunana a dagiti met aglaklako ti boga ket mabalin a mamulta ti tallo a ribu a pisos ngem no saanda latta a nagsardeng ket maikkat ti lisensiada nga aglaklako ti paputok.
Kabayatanna, kiniddaw ti pannakangiwat ti Ilocos Norte Police Provincial Office dagiti nagannak a bantayan a naimbag dagiti annakda nangruna kadagitoy a masansan nga awan ti klaseda a posible nga agusarda ti boga.
