LAOAG CITY – Nagtitipon dagiti kadakkelan nga instant noodles makers iti intero a lubong para iti maysa a taripnong a naangay ditoy Pilipinas.
Iti naiwayat a taripnong ket inkari dagiti instant noodles makers a pagbalinen da a nasustansya dagiti produkto da, a maysa nga addang a patien da nga ad-adda pay a mangpadur-as iti produkto da.
Inorganisar ti World Instant Noodles Association (WINA) ti World Instant Noodles Summit iti Taguig, Pilipinas.
Inbatad ni Koki Ando, Chairman ti World Instant Noodles Association ken Presidente ken Chief Executive Officer ti Nissin Foods a namnamaen na a dakdakkel pay ti pagdur-san ti produkto da ita a tawen bayat iti panagpirma ti grupo ti ‘Manila Declaration’ iti panagngudo ti summit.
Ti deklarasyon ket maysa a baro a pagalagadan iti panangituding kadagiti boluntaryo a target para iti industriya a nakatutuk iti nutrisyon ken salun-at, environmental-sustainability, kinatalged ti makan, ken ti panangsolbar kadagiti social issues.
