LAOAG CITY – Inpetteng ti Malacañang a saan a publicity stunt ti plano a panangipila ti kaso kontra kada dati nga House Speaker Martin Romualdez ken dati a Senate President Chiz Escudero mainaig iti maipagarup a maanomalya a flood control projects.
Inbatad ni Palace Press Officer Claire Castro, tunggal kaso ket dumaldalan iti naiget a panangtingiting sakbay nga ipila no sadinno dagiti ebidensia ti agbalin a pagibasaran ken naiget a suroten ti due process.
Inpaganetget ni Castro a saan nga aramid ti administrasion ti agipila ti kaso nga awan ti natibker a pagibasaran wenno agimula ti ebidensia kontra iti asinoman.
Innayonna a ni Presidente Ferdinand Marcos Jr. ti nangirugi ti imbestigasion a gagem a mapagsugbat dagiti karaman iti maipagarup a panangabuso iti pundo ti gobierno.
