LAOAG CITY – Binomba manen ti Israel forces ti siudad ti Rafah iti makin-abagatan a paset ti Gaza no sadinno a nakatayan ti 45 a Palestinians.
Segun iti Israeli Defence Forces, nangisayangkat dagiti soldadoda kadagiti ‘precise, intelligence-based’ actions no sadinno a natakuatanda dagiti tunnel a mabalin a kuta ti militante a Hamas iti Rafah.
Nupaty kasta, basar kadagiti residente, agparang a pinadas ti puersa ti Israel a naan-anay a napaliwkawkawan ti Rafah, nga addaan iti border iti Egypt ken nagbalin a sentro ti panangraut ti Israel sipud pay idi rugrugi ti Mayo iti daytoy a tawen.
Kabayatanna, pinilit dagiti tanke ti Israel a simrek iti makindaya ken amianan a paset ti Rafah no sadinno a napaliwkawkawan ti makindaya, abagatan ken makintengnga a paset ti siudad.
