LAOAG CITY – Maysa nga atleta idiay Japan ti nakairekord ti world record kalpasan a naileppasna ti marathon-na iti 270 kilometers iti uneg laeng ti 24 nga oras.
Kinumpirmran ti records keeping organization a Guinness World Records a ni Miho Nakata ti baro a world record holder ti titulo a “Farthest Run 24 hours Ultra Distance (female).”
Daytoy ket kalpasan a nakataray daytoy ti 270.363 kilometers. Nagun-od ni Nakata ti rekord kabayatan a nakipaset isuna ti 14th IAU 24 Hour World Championship a naiyuswat idiay Taiwan idi Disiembre 2023 no sadinno nga isuna ti nakagun-od ti medalya iti Women’s Individual division.
Basar iti Google Maps, ti kaadayo a 270 kilometers a tinaray ni Nakata ket maidasig iti gidyat manipud iti Cubao, Quezon City nga agturong iti San Fernando, La Union.
Kuna ni Nakata nga idi ubing pay laeng isuna ket saan a simmagid iti panunotna nga agbalin isuna kas ultramarathoner gapu ta ti paboritona nga sports ket basketball.
Naammirisna laeng a hiligna ti panagtaray idi nakipaset daytoy ti track and field club idi college student isuna.
