LAOAG CITY – Nakairekord ti baro a Guinness World Record idiay Jilin Province ti China kalpasan a naggigiddan a nagay-ayam ti trumpo ti 1,946 a tattao.
Ti organisasion a mangtengtengngel ti rekord a Guinness World Records ket pinasingkedanna a ti Jingyu County ket isu ti agdama nga agtagikua ti titulo a “The Most People Playing Whipping Tops Simultaneously” kalpasan a 1,946 kadagiti residenteda ti nagatendar a nagay-ayam iti trumpo iti isu met laeng a panawen.
Naisayangkat ti record breaking attempt idi Enero 22, iti nalawa nga arena ti yelo iti Songhua River Eco-tourism Scenic Area iti Baishan City.
Ni Wu Xiaohong, maysa a Guinness certification officer, ti adda iti nasao nga aktibidad tapno masigurado a tunggal makipaset ket i-spin ti trump-na iti lima a minuto tapno mairaman iti official tally.
Daytoy a record breaking event ket pinartuat ti Baishan City tapno maitandudo ti turismoda iti lubong.
