LAOAG CITY – Inlawlawag ni Barangay Kagawad Maricon Ventura, chairman ti Committee on Health iti Barangay 16, San Roque iti ili ti Bacarra a naka-home quarantine dagiti kabbalay ni IN-C774, babai, agtawen ti 30, Nurse it RHU, naggapo idiay Manila, ken symptomatic daytoy.
Daytoy ket iti laksid a saan a nagawid ni IN-C774 iti pagtaengan da bayat a nakadangpet ditoy probinsya.
Segun kenni Ventura, nagdesisyon da nga aghome quarantine dagiti kabbalay ni IN-C774 tapno saan met nga agamak dagiti kabarangayan na.
Inbatad pay ni Ventura nga awan met ti marikna a panagnerbyos dagiti kabbalay ti nurse a nagpositibo ken ti sintomas daytoy ket naggurigor.
Mainaig iti daytoy, kuna na a ni IN-C774 ket napan idiay Manila gapo ta manarimaan ti panangiproseso na iti panagaplikar na a mapan agtrabaho iti sabali a pagilyan.
Kunana a naiget met ti panagbantay da iti pagtaengan ni IN-C774 ken isuda nga opisyales pakairamanan dagiti tanod ken BHW ti mapan gumatang kadagiti kasapulan ti nasao a pamilya.
