LAOAG CITY – Naburak ti Mexico ti maysa a rekord iti Guinness World Record babaen ti panagaramid da ti maibilang kas kadakkelan a bowl ti guacamole.
Napasamak daytoy kabayatan ti 13th annual Avocado Festival iti Tancítaro idiay Mexico no sadinno a ti naaramid a guacamole iti kadakkelan a bowl iti lubong nga agdagsen ti 14,991-pound.
Ti record attempt ket inorganisar ti Local Plant Health Board ti Tancítaro, no sadinno a 1,000 a local growers ken dagiti residente ti nagtitinnulong tapno makiwar ti higante a bowl iti uneg ti 2 nga oras ken 30 a minuto.
Maipalagip a ti dati a rekord ket nagdagsen ti 10,961 pounds ken iggem ti Peribán, Mexico, idi 2022.
