LAOAG CITY – Kwinestyunaran ti kampo ti lider ti Kingdom of Jesus Christ a ni Pastor Apollo Quiboloy ti legal a nakaibasaran ti freeze order ti Court of Appeals kadagiti bank account ken assets ti religious leader.
Segun iti maysa kadagiti abogado ti Kingdom of Jesus Christ a ni Atty. Israelito Torreon, rumbeng nga adalen ti Department of Justice ti bilin ti appellate court.
Kinunana, nga immunan nga inpakaammu ti Department of Justice spokesperson ASec. Mico Clavano a ti nakaibasaran ti kastoy a bilin ket dagiti kaso ti pastor idiay America.
Ngem impapilitna nga adda prinsipio ti pagilian a territoriality no maipapan kadagiti krimen ken ti naaramid idiay Estados Unidos kas sapasap a pagannurotan ket rumbeng a madengeg idiay.
Kalikagom met a maammuan ti kampo ni Pastor Quiboloy ti ebidensia a nangilanad iti petision a mangpaneknek nga inusar ti pastor dagiti frozen bank accounts kadagiti mapapati nga illegal nga aktibidad.
Kinunana pay a ti kuarta ken sanikua ti Kingdom of Jesus Christ ket aggapu kadagiti miembroda.
Patien pay ti kampo ti pastor a ti pammilin ti arrest kontra ken ni Quiboloy ket politikal ti motibona nangruna ta nasinged daytoy iti pamilia Duterte.
Iti agdama, ur-urayen pay laeng ti kampo ni Pastor Quiboloy ti opisial a kopia ti freeze order, no sadinno nga agpaut ti daytoy iti 20 nga aldaw.
Maipalagip nga imbilin met ti Court of Appeals ti pannaka-freeze dagiti bank account ti Kingdom of Jesus Christ ken ti media arm da.
