LAOAG CITY – Inpetteng ni Barangay Chairwoman Erlinda Foster iti Barangay Pila ditoy ciudad ti Laoag a saan nga agpayso a saan da nga as-asistiran ti pamilya bayat a naka-quarantine dagitoy wenno bayat nga ur-urayen da ti swab test da.
Ummuna iti daytoy, ummuna a nagpositibo ti maysa nga ama wenno ni In-C486, maysa a partidor ken idi rabii ket nagpositibo met ti asawa na ken ti anak na a ni IN-C549 ken IN-C550.
Segun kenni Foster, ado dagiti makitkita da nga ayuda a mapmapan iti nasao a pamilya isut gapo na a ti laengen ited da kuma kadakuada nga aggapo met laeng kadakuada ket agserbi laengen kadagiti agbanbantay iti entrance ken exit iti ligason a naka-lockdown.
Malaksid iti daytoy, kunana a saan nga agpayso nga arig na inbaba na dagiti nagpositibo iti virus.
Inlawlawag na pay a maipagarop nga inbatad ti ina a nagpositibo nga adda ti nangitawag kenkuana a negatibo iti virus ken nagunget pay daytoy ken isuna a mismo ti nangikkat kadagiti barikada gapo ta ti inpetteng na nga awan met ti virus kadakuada rason a saanen a nakauni dagiti barangat kagawad.
Mainaig iti daytoy, kuna ni Foster a timmawag kenkuana idi rabii ti City Health Office tapno ipakammo a positibo dagiti agina iti virus ken masapol nga agrubwaten dagitoy gapo ta masukon ken ma-isolate dagitoy.
Kunana nga iti panagturong na iti pagtaengan dagiti agina ket nakita na dagiti kagawad ken ditoy na a naamoan a rimwar dagiti maseknan idi malem kalman gapo iti pammati da a negatibo dagitoy.
Innayon na nga idi adda isunan iti pagtaengan dagiti agina ket maipagarop nga inbaga ti ina a saan da a maipapaayan ti agserbi kadakuada kabayatan ti panagquarantine da ken ti insungbat ti kapitan nga ado met ti makitkita da nga ayuda a maaw-awat da.
Kabayatannan, kuna ti kapitan a mapalubusan a sumrek ken rumwar dagiti sumagmamano a residente gapo ta nasisita met ti ranta da kas iti panagburas kadagiti mula da a nateng nga isu ti agserbi kadakuada bayat ti pannaka-lockdown ti ligason nga ayan da.
