LAOAG CITY – Kinumpirmaran ni Brgy. Chairman Alwin Pillos ti Brgy. Valdez iti ili ti Marcos nga adda ti maysa nga indibidual ti nanggandat nga agilibas ti karne ti baboy nga iserrek na iti uneg ti Barangay da.
Inlawlawag na nga idi sinaludsod dagiti kakadua na a Barangay Officials nga agbanbantay iti dayta a gundaway no ania a klase a karne ti nakasupot nga iggem ti maseknan ket ti insungbat na ket karne ti baka daytoy.
Nupay kasta, kuna na nga idi kitaen ken lukatan dagiti opisial ti nakasupot ket naduktalan da a karne daytoy ti baboy.
Gapu iti daytoy, saan dan a pinalubusan pay a simrek iti Barangay da ti maseknan gapu ta saan na nga inpakaammo ti pudno a linaon ti iggem na a supot.
Immapela met ni Brgy. Chairman Pillos ti kooperasion dagiti umili nga irakurak da ti pudno kadagiti saludsod da tapno maliklikan ti posible a panagwaras ti ASF iti Barangay-da.
Mainaig iti daytoy, kunana nga adda ti uppat a Sitio iti Barangay da a pakaisayangkatan ti disinfection kadagiti ubong dagiti baboy kontra iti African Swine Fever wenno ASF nga agdama a mapaspasaran iti nasao nga ili.
Segun kenkuana, dagiti Sitio a pakaisayangkatan ti disinfection ket iti Sitio Aurora, Sitio Cielo, Sitio Bituin ken Sitio Marilyn.
Inbatad na nga immunan a nagiyuswat da ti disinfection iti Sitio Simeon, Sitio Suerte ken Sitio Filipinas idi kalman.
Kunana a kiniddaw dagiti kabarangayan na ti pannakaisayangkat ti disinfection tapno maprotektaran dagiti taraken da a baboy ken maprebentaran ti panagraira ti ASF virus.
Kabayatanna, basar iti kaudian a datos da ket addan ti sangapulo a hog raisers ti nagparehistro iti Department of Agriculture tapno ma-insured dagitoy ken matulungan gapu iti pannakaapektarda gubuay iti ASF virus.
