LAOAG CITY – Balligi a naarestar ti maysa a karpintero iti Anti-Illegal Drug Buy-bust Operation iti Barangay 30-W Baoa West iti siudad ti Batac.
Segun ken ni P/Lt.Col. Adrian Gayuchan, Hepe ti Batac City Police Station, nabigbig ti suspek a Vaniejoy Lelius Yate y Biding, agtawen ti 38, awanan asawa ken residente iti nasao met laeng a barangay.
Inbatadna a natiliw ti suspek kalpasan a naglako ti maysa nga heat sealed transparent plastic sachet a naglaon ti maipagarup a shabu iti police poseur-buyer.
Malaksid iti daytoy, naala pay manipud iti suspek ti dua nga heat sealed transparent plastic sachet a naglaon ti maatap a shabu, maysa a ribu a pisos a nausar kas buy-bust money ken dadduma pay a drug paraphernalia ken maysa a Caliber .38 a paltog ken adda ti kargana a maysa a bala daytoy.
Mainaig iti daytoy, inlawlawag ni P/Lt.Col. Gayuchan a ti nakumpiskar a maipagarup a shabu ket agdagsen ti sumurok-kumurang 1.5 grams nga agbalor ti 10,200 a pisos.
Naiget a naglikudan ti suspek a kukuana dagiti naala a kontrabando kontra kenkuana.
Kabayatanna, sumango ti suspek iti kaso gapu iti panaglabsing iti Republic Act No. 9165 wenno ti Comprehensive Dangerous Drugs Act of 2002, Republic Act No. 10591 wenno ti Comprehensive Firearms and Ammunition Regulation Act ken ti Omnibus Election Code wenno ti Gun Ban.
